Sayt üzrə axtarış

















Əsas səhifə / XƏBƏRLƏR

2018-02-03
Baş Prokurorluğun nümayəndə heyəti Beynəlxalq tədbirdə iştirak etmişdir

Yanvarın 30-dan 31-dək Pakistan İslam Respublikasının paytaxtı İslamabad şəhərində İqtisadi Əməkdaşlıq Təşkilatına (ECO) üzv dövlətlərin Baş prokurorlarının 3-cü görüşü keçirilmişdir.

 Təşkilata üzv dövlətlərin prokurorluq orqanları əməkdaşlarının iştirak etdiyi tədbirdə ölkəmizi Baş prokurorun müavini Namiq Əsgərovun rəhbərlik etdiyi nümayəndə heyəti təmsil etmişdir.

 Baş prokurorun müavini çıxışında Azərbaycan və Pakistan arasında formalaşmış zəngin tarixə malik və ildən-ilə daha da genişlənməklə dərinləşən ikitərəfli münasibətlərin inkişafı, hər iki dövlət başçılarının siyasi iradələri nəticəsində ölkələrimiz arasındakı münasibətlərin daha da genişləndiyini, ölkəmizin ECO çərçivəsində əməkdaşlığa böyük önəm verdiyini, təşkilatın möhkəmlənməsi istiqamətində müvafiq işlər gördüyünü, bir çox səmərəli təşəbbüslərin müəllifi olduğunu iclas iştirakçılarının diqqətinə çatdıraraq, 2017-ci ilin 6-7 iyun tarixlərində ECO-ya üzv dövlətlərin prokurorluq, ixtisaslaşdırılmış korrupsiyaya qarşı mübarizə qurumları rəhbərlərinin və ombudsmanlarının Bakıda keçirilmiş üçüncü iclasının əhəmiyyətini xüsusi vurğulamışdır.

 Azərbaycan Respublikasının Prezidenti cənab İlham Əliyevin 2017-ci il 10 fevral tarixli sərəncamından sonra ölkəmizdə həyata keçirilən tədbirlər barədə ətraflı məlumat verən N.Əsgərov Cinayət, Cinayət-Prosessual və Cəzaların İcrası Məcəllələrinə edilmiş dəyişikliklərin humanist mahiyyəti barədə danışmışdır.

 Daha sonra Azərbaycan nümayəndə heyəti Pakistanın Baş prokuroru Aştar Ausaf Ali, həmçinin Türkiyə, Qazaxıstan, Özbəkistanın, Tacikistan nümayəndə heyətləri ilə ikitərəfli görüşlər keçirərək geniş fikir mübadiləsi aparmışdır.

 Yanvarın 31-də nümayəndə heyətlərinin rəhbərlərini qəbul edən Pakistan İslam Respublikasının Prezidenti Məmnun Hüseyn ECO-ya üzv dövlətlərinin prokurorluq orqanları arasında səmərəli əməkdaşlığın transmilli cinayətkarlıqla mübarizə sahəsində zəruriliyini vurğulamışdır.

 Azərbaycan Respublikasının Pakistan İslam Respublikasındakı Səfirliyinin əməkdaşları tədbirdə yaxından iştirak etmişlər.

Tədbirin yekununda İslamabad bəyannaməsi qəbul edilmişdir.